مبارك على فراش الموت ...... ماذا يقول؟التفت الأسرة حول فراش الزعيم وهو يلفظ أنفاسه الأخيرة
.... قال الزعيم بصوت ضعيف ولكنه حازم فى نفس الوقت
حسنى: كلكم موجودين
سوزان: أيوه ياحسنى ... أنا جنبك أهه ... وأدى جمال وعلاء ... قمرين دول ولا عينين
حسنى: طب إسمعوا اللى حقوله كويس
جمال: سامعينك يابابا ... إتكلم
حسنى: مصر دى كنز.. ياولاد ... إمكسوا فيها بإيديكم وسنانكم بنسرق فيها بقالنا سنين وسنين ولسه بتدينا
علاء: هيا دى البركة اللى بيقولوا عليها يابابا
حسنى: أيوه يابنى .... ربنا يبارك لكم ولعيالكم فيها .... ودلوقتى
علاء: إنته على الهوى يابابا ..... إتكلم
حسنى: أنا مش مديون لحد ياولاد ..... يعنى أى واحد يصيع عليكم
ويقول لكم أبوكم كان مستلف منى فلوس تفوا فى وشه على طول
علاء: إطمن يابابا ..... حرامى على حرامى ما يلعبش
حسنى: أنا سيبت لكم ياولاد اللى يكفيكم إنتوا وعيالكم وعيال عيالكم ويفيض فلوس متلتلة متتعدش
مش حقول لكم حافظوا عليها وبس لآلآلآلآ ... زودوها كمان وكمان لاجل ما روحى ترتاح وأنا فى تربتى
جمال: هيا الفلوس اللى إنتا عملتها يابابا دى بتسميها فلوس
شفنى أنا وعلاء حنعمل إيه ولا صحيح حتشوفنا إزاى ..... عموماً ما تقلقش
حسنى : ودلوقتى إسمعوا وصيتى ..... الحكم لاولاد مبارك ... لازم أول ما جمال يحلف اليمين تغيروا إسم مصر وترجعوه زى ما كان زمان أيام الملك فاروق والملكة نازلى (المملكة المصرية)
جمال: مفهوم يابابا ..ز.. خش فى اللى بعده
حسنى: الجيش والشرطة والأزهر ... أوعوا واحد من التلاته دول يخرج عن طوعكم أبداً
علاء: مفهوم برده .... اللى بعده .... ياساتر ده إنته ملل
سوزان:عيب ياعلاء لما تكلم أبوك كده
علاء: بهزر ياماما
حسنى: الهرم لأم العيال ... ليكى ياسوزان بعد ما خدمتينى بتفانى وإخلاص طول السنين دى
سوزان: هرم !!!!!!! ..... هو دى آخرة صبرى !!! ...... وده يسوى كام ده
!!!! علاء وهو يمسك بالألة الحاسبة : يسوى كتير ياماما .. لو تحبى أتصرف لك فيه ممكن يعمل معاكى مبلغ كويس سوزان: مش ح ارضى باأقل من التلات أهرامات وأبو الهول
حسنى: مش خسارة فيكى ياغالية
أثار النوبة لعلاء .....والأقصر لجمال
ودلوقتى نيجى للميه
الساحل الشمالى لعلاء والبحر الأحمر لجمال وقناة السويس تخصصوا دخلها صدقة جارية على روحى
سوزان: إنته أكيد مخبول ... مليار ونص دولار صدقة جارية على روحك !!!!
جمال: ما تاخديش على كلامه ياماما .... ده يبقى كتير لو طلعنا 100 ولا 200 جنيه على روحه للفقرا
علاء وهو يمسك بالألة الحاسبة: ممكن نطلع لحد ألف جنيه يا جمال ... السيولة تسمح
حسنى: أوعوا تفرطوا فى حبيب العادلى من بعدى يا ولاد .. حبيب قلبه ميت وإيده طرشه
وهوه ده اللى ينفع مع الغجر اللى هنا
جمال: بس ما بيعجبنيش شنبه يابابا
حسنى: إنته مالك ومال أم شنبه ..... إحنا بنشترى مجرم
جمال: أعاهدك يابابا إنى حخليه معايا ومش حفرط فيه أبداً
حسنى: الشيخ طنطاوى ياولاد راجل بركة ...... يمين يمين شمال شمال .... أوعوا تفرطوا فيه بس ما تخلوهوش يصلى عليا لأنى بصراحة مش متأكد إن كان ربنا حيقبل منه ولا لأ
علاء: ولا يهمك يابابا ... حاخلى أنكل كمال الشاذلى يصلى عليك
حسنى: والله لو عملتها ياعلاء لكون متبرى منك إلى يوم الدين
علاء: بهزر معاك يابابا
أنكل كمال مش حافظ الفاتحة
حسنى: المشير طنطاوى ياولاد .... مش حوصيكم عليه . . . الراجل ده عامل زى الست المستحية .... حاطط وشه فى الأرض على طول وعمره ما استجرى يرفع عينه فيا ... وفى نفس الوقت ماسك الجيش بإيد من حديد
سوزان: هوه فعلاً خجول وكل ما يشوفنى ما يقوليش غير ياست هانم .... إبقى خليه معاك ياجمال
جمال: حاضر ياماما
حسنى: عايز جنازتى ياولاد الناس تحكى وتتحاكى عنها ...... هاتوا المخرج
الإيطالى ده اللى إسمه مكافيللى يصورها
علاء وهو يمسك بالألة الحاسبة: هوه حيكلفنا كتير ... لكن ممكن فى الأخر نلم مبلغ معقول لو خلينا شركة أجنبية تحتكر حق توزيع الفيديو فى أوروبا وأمريكا
حسنى: عايز أحلى مدفع يشيل النعش يا ولاد
جمال: مدفع رشاش
سوزان: الهزار مش فى الحاجات دى يا جمال
جمال: آسف يا ماما
حسنى: عايز أدفن فى شرم الشيخ ياولاد جنب أولمرت وشارون
علاء: بلاش كفر مصيلحة يعنى ؟
حسنى: لأ كلها براغيت ياعلاء ........ وإسم شرم الشيخ كمان.. أشيك بكتير
16 التعليقات:
ههههههههههههههه
عليه العوض ومنه العوض
هم يضحك وهم يبكى
انا عايز خمسة يكتفوني و تلاته يربطوني و اربعة على السلم و سبعة فوق السطوح و الباقي يستناني في العربية تحت، احنا هنقبض عليها يا باشا و نازلين وراك على طول
ههههههههه
تحياتي
ملحوظة: تحياتي
ملحوظة اخيرة: تحياتي
:)
مرسى على التعليق عندى و أه معنديش مانع نعمل الرابطه الى إنت عايزها
ههههههههه ضحكتنا يا راجل علي العالم دول
تحياتي
المهاجر
شكرا لك بس فلا هم يضحك وانا مبسوطة انى قدرت اضحك حد
*******************
Xee
تلقيك موتنى من الضحك
اهون عليك تقبض علي يا باشا
*******************************
كبر دماغك
شكرا لتفضلك لزيارتى واحب اشوفك دايما
وحنشوف موضوع الرابط
*********************************
ابن ناصر
انا بنت مش راجل
بس بنت بستين راجل
هههههههههههههه
وصية الميت لازم تنفذ مهما كانت صعبة ولا انتو عايزينو ميرتحش فى نومته
سحر
بصراحة جامدة جدا
و كوميدية
واخدينها تكية أبوهم يوزوعها براحتهم
و كاننا شوية عصافير في قفص
أحييكي علي الموهبة الجميلمة جدا دي
و ربنا يوفقك و يحميكي
و اسمحيلي أبلغ عنك أمن الدولة عشان يمسكوكي
ممكن ؟
nice blog you have here! i enjoyed browsing!
ايه ده يا دماغ
بقي جيمي دمه خفيف وبيعرف يهزر كمان
ام انت عليك كلام
امال السحنة اللي مبتضحكش للرغيف السخن مصدرهالنا ليه علطول
شكلك يا دماغ بدياها سخنة
و مخبطه في الكل
شكلنا حنعملك بانر زي بتاع الشرقاوي ولا منعم قريب
بهزر معاك ربنا يصون كل المدونين و يخليهم لكيبورداتهم قادر يا كريم
عسل و الله يا كريمة.. أنا ضحكت حتى استلقيت على قفاي
سلام عليكم
رغم الخيال البارع والحوار الفني العالي وخفة الظل المضحكة المبكية .. إلا ان الكلام لو تسمحي لي زياده شوي .. يعني بجد يقدروا يحاكموكي بالقانون .. طبعاًممكن من غير قانون ولايحزنون .. لكن ممكن يمشوها رسمي وتبقى مشكله عويصة .. يا ريت تخللى بالك كويس
محتاجين دماغك
هههههههه
فعلا اه يادماغى
بس انت تفتكر جيمى
هيستنى على حسنى لما يموت لوحده
ولا الوصيه دى هتكون
بعد لما يسمه
البوست ده حلو جدا
تحياتى
ههههههههههه
جامدة موووووووووووت والله
فعلا ااااااااااه يا دماغي
هههههههههههههه....معقولة فى كدةهههههه
لا بس والله ينفع يعنى الكلام دامع الناس دى
كلامك فظيع بجد...تحفة
احييكى بشدة
السعودى
على ما اعتقد ان ده حقيقه صح
هما اخدو اثار النوبه والنوبين من زمااااااان
لما قالو ان السد هيعم على الخير
الخير جى على الناس كلها
الا على النوبى
مش المفرود بردو بعد ما بنو السد يرجعو اهل النوبه الغلابه تانى وره بحيره ناصر اللى اسمها لحقيقى بحيره النوبه
اسف على الاطاله
أشهد أن لا اله إلا الله وأن محمد رسول الله
لن يتغير الحال حتى نتغير
"غيروا ما بأنفسكم"
الموت حق على كل أنسان وليس فيه من تريقة ولا هزار وبموت الحاكم يكون هو المحكوم عليه بين يدي الله إدعوا له بالمغفرة والسماح حتى تكتب لنا.
إرسال تعليق